მაჭავარიანი ვახტანგ

21:14, 30 აპრილი 2025-ის ვერსია

ვახტანგ მაჭავარიანი – (18 თებერვალი 1951, თბილისი, ქართველი დირიჟორი. დაამთავრა თბილისის კონსერვატორია ორი განხრით, როგორც პიანისტმა (1973 პროფ. ე. გურევიჩის კლასი) და დირიჟორმა (1977 პროფ. ო. დიმიტრიადის კლასი). გაიარა სტაჟირება მოსკოვში გ. როჟდესტვენსკისთან, 1978-80, ვენაში კ. ოსტერრაიხერთან და ლ. მააზელთან (ვენის საოპერო თეატრში. ორივე -1982-83). 1984-91 ლენინგრადის საოპერო თეატრში დირიჟორობდა სარეპერტუარო სპექტაკლებს. აქ მოამზადა და დადგა ა. მაჭავარიანის ბალეტი „ვეფხისტყაოსანი“ (1985), რომელიც შესრულდა აგრეთვე თეატრის გასტროლების დროს აშშ-ში, კანადაში, საფრანგეთში, თბილისში. ბორდოს თეატრში დადგა მუსორგსკის „ბორის გოდუნოვი“ (1994), ედინბურგში ბარტოკის ოპერა „ლურჯწვერა ჰერცოგის სასახლე“ და სტრავინსკის ოპერა „ოიდიპოს მეფე“(1990). გასტროლებს მართავს მრავალ ქვეყანაში. 1996-2004 საქართველოს სახელმწიფო სიმფონიური ორკესტრის მთავარი დირიჟორი იყო.

გ. ტორაძე

წყარო

მუსიკის ენციკლოპედიური ლექსიკონი