სტრაბონი
სტრაბონი – (ძვ. წ. 64-63 – ახ. წ. 23-24), ძველი ბერძენი ისტორიკოსი და გეოგრაფი.
დაიბადა წარჩინებულ ოჯახში. მიიღო თავისი წრის შესაფერისი განათლება, ხანგრძლივი სიცოცხლის დიდი ნაწილი გაატარა მოგზაურობებში.
სტრაბონის პირველი თხზულება „საისტორიო ჩანაწერები“ წარმადგენდა პოლიბიოსის „ისტორიის“ გაგრძელებას და მოიცავდა პერიოდს ძვ. წ. 46-31. მისგან მხოლოდ ფრაგმენტებია ცნობილი. „საისტორიო ჩანაწერების“ გაგრძელებას წარმოადგენს „გეოგრაფია” 17 წიგნად. ნაშრომი მოღწეულია სრული სახით. თავის თხზულებაში სტრაბონი, ახდენს ანტიკურ მეცნიერებაში დაგროვებული ცოდნის თავმოყრას. იძლევა ცალკეული ქვეყნების არა მარტო გეოგრაფიულ აღწერას, არამედ საფუძვლიანად მსჯელობს მათ პოლიტიკური, ეკონომიკური და ეთნიკური მდგომარეობის შესახებაც. მნიშვნელოვან ცნობებს გვაწვდის იბერიისა და კოლხეთის შესახებ. „გეოგრაფიაში ვრცლადაა გადმოცემული საქართველოს სამხრეთ ნაწილში მცხოვრები ძველი ქართველი ტომების გავრცელების არეალიც. აღწერილია ის ურთიერთობები, რომლებიც არსებობდა ძველი სამყაროს ცალკეულ ხალხებს შორის.
