დეზინფორმაცია

დეზინფორმაცია - (dez ცრუ და ლათინური informatio - ახსნა, გადაცემა), ოპერატიული (სტრატეგიული) შენიღბვის ხერხი, რომელიც გულისხმობს საკუთარი ძალების (ჯარების), მათი დაჯგუფების, შემადგენლობის, შეიარაღების, ბრძოლისუნარიანობის, საბრძოლო მოქმედებების გეგმების და ა.შ. შესახებ ცრუ მონაცემების მიზანმიმართულ გავრცელებას მოწინააღმდეგის შეცდომაში შეყვანის მიზნით.

დეზინფორმაციისთვის გამოიყენება კავშირგაბმულობა, ბეჭდვითი ორგანოები, რადიო-ტელემაუწყებლობა და სხვა. დეზინფორმაცია ხორციელდება დემონსტრაციულ ქმედებებთან, იმიტაციასა და დაფარვით ღონისძიებებთან კომპლექსში.

წყარო

ქართული სამხედრო ენციკლოპედიური ლექსიკონი. აკადემიკოსის, გენერალ-მაიორ ელგუჯა მეძმარიაშვილის საერთო რედაქციით. თბილისი,2017