პრადოს მუზეუმი
NPLG Wiki Dictionaries გვერდიდან
14:46, 27 სექტემბერი 2022-ის ვერსია, შეტანილი Tkenchoshvili (განხილვა | წვლილი)-ის მიერ
პრადოს მუზეუმი (ესპ. Museo del Prado), მსოფლიოს ერთ-ერთი საუკეთესო მუზეუმი და ხელოვნების გალერეა ესპანეთის სამეფოს დედაქალაქ მადრიდში, სადაც XIV-XIX საუკუნეების ევროპული ხელოვნების მსოფლიოში საუკეთესო კოლექციაა მოთავსებული. „მუზეო დელ პრადო“ ერთ-ერთ შენობათაგანია აშენებული კარლოს III-ის მეფობის დროს გრანდიოზული მშენებლობის პროექტში, რომლის მიზანი მადრიდისთვის მონუმენტური ურბანული დაგეგმარების შექმნა იყო. შენობა გვიანდელი კლასიციზმის ბრწყინვალე ნიმუშია. მუზეუმში განთავსებულია მსოფლიოში აღიარებული მხატვრებისა და მოქანდაკეების შედევრები, რომელთა შორისაა ველასკესის, გოიას, ბოსხის, ელ გრეკოს, რუბენსის, რაფაელის, ტიციანის, მურილიოს, ბოტიჩელის, კარავაჯოს, დიურერის, რემბრანდტის, ვერონეზეს, პიკასოსა და სხვათა საუკეთესო ექსპონატები.
