ჰეივუდი ჯონ
ჯონ ჰეივუდი – (ინგლ. John Heywood, 1497–1580), ინგლისელი პოეტი და დრამატურგი.
ბიოგრაფიული ცნობები მის შესახებ თითქმის არ შემორჩენილა. მისი ლიტერატურული მოღვაწეობა 1530-1580 წლების ფარგლებში მიმდინარეობდა. ჰეივუდის შემოქმედება მრავალფეროვანი იყო, მაგრამ ძნელია დასაბუთებით თქმა, რომელი ნაწარმოები ეკუთვნოდა მას. ცნობილია, რომ მას ეკუთვნის ანდაზების კრებული სახელწოდებით „Centuries of Proverb“, რომელიც ინგლისურენოვანი ანდაზების პირველი კრებულია.
ინგლისური დრამის ისტორიაში ჰეივუდს მნიშვნელოვანი ადგილი უჭირავს. მის ინტერლუდიებში გმირების ხასიათები ინდივიდუალიზებული იყო. მან ასევე დიდი როლი ითამაშა მორალიტეს განვითარებაში და ყოფითი კომედიის ჩამოყალიბების საქმეში. მის მიერ შექმნილმა ინტერლუდიებმა მოგვიანებით საფუძველი ჩაუყარა ინგლისური დრამის იმ ფორმებს, რომლებიც მიღებული იყო ელიზაბეთურ პერიოდში.
ჯონ ჰეივუდის ინტერლუდიებია: „მონაზვნების მხიარული სცენები, მღვდლისა და მის მეზობელ პრატოს თანხლებით“, „ოთხი პ“ (კომიკური სცენა მოხეტიალე მგზავრის, გამყიდველის, აფთიაქარის და ვაჭრის მონაწილეობით), „მხიარული სცენა ცოლ-ქმრისა და სოფლის მღვდლის მონაწილეობით“. ამ ნაწარმოებებში სასულიერო პირები კარიკატურულ პერსონაჟებად იყვნენ გამოყვანილები. მაყურებელში განსაკუთრებულ სიცილს იწვევდა მათი სასიყვარულო სცენები.
