ჟორდანია გიზო
გიზო ჟორდანია – (დ. 25 სექტემბერი, 1934, ლანჩხუთი — გ. 19 ნოემბერი, 2016, თბილისი), რეჟისორი, საქართველოს სსრ სახალხო არტისტი, პროფესორი, ა. შვაიცერის „მშვიდობის მედლის“ მფლობელი, კოტე მარჯანიშვილის სახელობის, სანდრო ახმეტელის სახელობის, მემედ აბაშიძის სახელობის პრემიების ლაურეატი, შოთა რუსთაველის სახელობის სახელმწიფო პრემიის ლაურეატი (1995).
დაიბადა 1934 წლის 25 სექტემბერს ლანჩხუთში, მოსამსახურის ოჯახში. 1952 წელს დაამთავრა თბილისის 24-ე ვაჟთა საშუალო სკოლა, 1957 წელს — შოთა რუსთაველის სახელობის თეატრალური ინსტიტუტის სარეჟისორო ფაკულტეტი (იქვე დატოვებული იქნა პედაგოგად). 1961 წელს დაინიშნა ბათუმის ი. ჭავჭავაძის სახელობის დრამატული თეატრის მთავარ რეჟისორად. 1965-1970 წლებში მუშაობდა რუსთაველის სახელობის თეატრში მთავარ რეჟისორად, 1970-1979 წლებში თბილისის ზ. ფალიაშვილის სახელობის ოპერისა და ბალეტის თეატრის მთავარი რეჟისორია. 1979-1986 წლებში გრიბოედოვის სახელობის თეატრის დირექტორი და ამავე დროს მთავარი რეჟისორიცაა. 1986-1991 წლებში რუსთაველის თეატრის მთავარი რეჟისორი და მცირე სცენის ხელმძღვანელია. 1991 წელს — შოთა რუსთაველის სახელობის თეატრალური ინსტიტუტის რექტორად ინიშნება (1992-წელს უკვე ირჩევენ ამავე თანამდებობაზე).
გიზო ჟორდანიას დადგმული აქვს ასამდე სპექტაკლი. მათ შორის: დ. კლდიაშვილის „სამანიშვილის დედინაცვალი“, შექსპირის „ჰამლეტი“, მ. ჯავახიშვილის „მუსუსი“ (რუსთაველის თეატრი), პ. კაკაბაძის „ყვარყვარე თუთაბერი“, ვაჟა-ფშაველას „გველისმჭამელი“, ა. სამსონიას „ჩემი შვილი სიმონი“ (ბათუმის თეატრი), ნ. დუმბაძის „მარადისობის კანონი“, პ. კაკაბაძის „ყვარყვარე თუთაბერი“ (სოხუმის თეატრი), რ. გაბრიაძის „სამოთხის ჩიტი“ (მარჯანიშვილის თეატრი), ზ. ფალიაშვილის „აბესალომ და ეთერი“, ო. თაქთაქიშვილის „მინდია“ (ზ. ფალიაშვილის სახელობის ოპერისა და ბალეტის თეატრი), ზ. ფალიაშვილის „აბესალომ და ეთერი“ და რ. ლაღიძის „ლელა“ (ბათუმის საოპერო თეატრი).
გ. ჟორდანიამ 70-იან წლებში გერმანიაში დადგა ზ. ფალიაშვილის „დაისი“ (1973), „აბესალომ და ეთერი“ (1976) და ო. თაქთაქიშვილის „მინდია“ (1974). დადგმებს ფართოდ გამოეხმაურა უცხოეთის პრესა.
1993 წელს ბათუმში გიზო ჟორდანიას სპექტაკლით (ზ. ფალიაშვილის „აბესალომ და ეთერი“) საფუძველი ჩაეყარა ახალ საოპერო თეატრს.
1995 წელს, ბათუმის საოპერო თეატრის სცენაზე დადგმული ოპერების: ზ. ფალიაშვილის „აბესალომ და ეთერის“ და რ. ლაღიძის „ლელას“ რეჟისურისათვის, გაიოზ (გიზო) ჟორდანიას შოთა რუსთაველის სახელობის სახელმწიფო პრემია მიენიჭა.
ჟ. ბათუმის ბავშვთა საოპერო თეატრის ერთ-ერთი დამაარსებელია, სადაც კ. გოცის მიხედვით დადგა „პრინცესა ტურანდოტი“ (2000). 2016 თბილისის განახლებულ საოპერო თეატრში დადგა ზ. ფალიაშვილის ოპერა „აბესალომ და ეთერი“.
