აერომობილური ოპერაცია
აერომობილური ოპერაცია - საბრძოლო მოქმედებების ფორმა, რომლის არსია აერომობილური (საჰაერო-მოიერიშე) ფორმირებების ფარული და სწრაფი გადასროლა ჰაერით მოწინააღმდეგის ზურგში, მათ მიერ საჰაერო-სახმელეთო დარტყმების მიყენება შერჩეული ობიექტებისათვის და სწრაფი მანევრის შესრულება ახალ რაიონებში.
აერომობილური ოპერაციის ამოცანებია:
- ცალკეული რაიონების და ადგილმდებარეობის მონაკვეთების (პლაცდარმები, უღელტეხილები და სხვა) ხელში ჩაგდება და შენარჩუნება;
- მნიშვნელოვანი ობიექტების განადგურება;
- მოწინააღმდეგის ორგანიზებული უკანდახევისთვის ხელის შეშლა;
- მის II ეშელონებთან (რეზერვებთან) ბრძოლა;
- საჰაერო და საზღვაო დესანტების გადასხმის უზრუნველყოფა და სხვა.
აერომობილური ოპერაციის მოსაწყობად სახმელეთო ჯარებისა და საარმიო ავიაციის (სახმელეთო ჯარების ავიაციის) გამოყოფილი ნაწილებისა და ქვედანაყოფებისაგან იქმნება ტაქტიკური აერომობილური ჯგუფები, რომელთა საბრძოლო წყობა შედგება სამი ეშელონისაგან: მოიერიშე, შემდგომი და ზურგის.
ტაქტიკური აერომობილური ჯგუფის გადასხმის წინ ხდება მოწინააღმდეგის საცეცხლე დაზიანება გადაფრენის გზაზე და გადასხმის რაიონში (ზონაში) რაკეტებისა და ავიაციის, მათ შორის, საბრძოლო შვეულმფრენების დარტყმებით. აერომობილური ჯგუფების მოქმედებას მხარს უჭერენ საბრძოლო ვერტმფრენები და ტაქტიკური ავიაცია.
