სვანიძე ნათელა
ნათელა სვანიძე – (4. IX. 1926, ახალციხე], ქართველი კომპოზიტორი, საქართველოს ხელოვნ. დამსახურებული მოღვაწე (1981). 1951 დაამთავრა თბილისის კონსერვატორიის საკომპოზიციო განყოფილება (პროფ. ა. ბალანჩივაძის კლ.). 1956-იდან საქ. სახელმწ. თეატრ. ინ-ტში ასწავლიდა მუს.-თეორიულ დისცი პლინებს (პროფ.). სვანიძე ავანგარდული შემოქმედებითი და ტექნოლოგიური მეთოდების ერთ-ერთი წამომწყებია ქართულ მუსიკაში. ძირითადი ნაწარმოებებია: 3 სიმფონია: I – ფორტეპიანოს, სიმებიან და დასარტყმელ საკრავთათვის (1967), II (1983), III სიმფონია-ბალეტი (1968), კამერული ორატორია „ფიროსმანი“ ვოკალური სექსტეტის, მკითხველის, სოლისტისა და ინსტრუმენტული ანსამბლისათვის (ბ. პასტერნაკის, პ. ანტოკოლსკისა და ტ. ტაბიძის სიტყვებზე) – ამ ჟანრის ერთ-ერთი საუკეთესო ნიმუში ქართულ მუსიკაში (1970). მას ეკუთვნის აგრეთვე ორატორია „ქართული ლამენტაციები“ (1975), „ბურლესკა“ ფორტეპიანოს, ჩასაბერი და დასარტყმელი საკრავებისათვის (1965), „წრე“ – ორი მომზადებული ფორტეპიანოსათვის (1972) და სხვ.
გ. ტორაძე
