წიკლაური მარიამ

წიკლაური მარიამ − (1960), ქართველი პოეტი, საბავშვო მწერალი, მთარგმნელი.

დაიბადა თბილისში. 1983 წელს დაამთავრა თსუ-ს ქიმიის ფაკულტეტი. მუშაობდა პედაგოგად, სხვადასხვა გამომცემლობის რედაქტორად. რადიო „ივერიაში” უძღვება ორ საავტორო გადაცემას: „საუბრები საბავშვო ლიტერატურაზე” და ლიტერატურული სალონი „ერთი საათი”. იგი ინიციატორია საქართველოში „ქართული საბავშვო წიგნის დღის − 27 ოქტომბრის” დაწესებისა. არის ამავე ფონდის ეგიდით გამომავალი საბავშვო ლიტერატურული ალმანახის რედაქტორი. მისი ნაწარმოებები შესულია სხვადასხვა კრებულში, ანთოლოგიაში, სახელმძღვანელოში. მისი ლექსები, თარგმანები, წერილები, ესეები სისტემატურად ქვეყნდება ლიტერატურულ პერიოდიკაში.

კესოს ლექსი

ესო-მესო, გაჩნდა კესო!

სხივად შეემატა დღესო,

როცა სძინავს − მთვარესა ჰგავს,

როცა ღვიძავს − დილის მზესო.

ქვეყნის თვალი გაიზრდება −

ფერიებმა ასე თქვესო.

ანგელოსი ნანას უმღერს

დედის ხმით და ასმევს რძესო,

კესო კიდევ გულში ნატრობს

ლამაზ-ლამაზ დებს და ძმებსო!

წყარო

ქართველი პოეტები (ენციკლოპედია)