საქართველოს მთებში გაგაჩინა ზენამ,
სიყვარულის ლექსის, სადღეგრძელოს ენავ!
მოიმღერა დღემდე უძველესმა ტომმა
შლეგი  ჩანჩქერების ნაპრალებზე ხტომა;
მყინვარების ღვთიურ ბრწყინვალებით დნობა,
ჯაგნარებში  ირმის ჯოგის ნავარდობა;
გაფანტული ფარის მთაზე დაჯანღება
და ქართული ფარის ფარზე დაჯახება.
უძველესმა ტომმა დღემდე მოიმღერა,
მწიფე პურის ყანა ქარში როგორ ღელავს;
სარკინეთში  გრდემლზე როგორ სცემენ უროს
და ვარსკვლავი ზღვებზე როგორ მოგზაურობს;
ან მთვარიან ღამით ციხე-კოშკის ჩრდილში
რა ტკბილია ფარულ სიყვარულის შიში;
როცა ღამისმთევლებს ლხინი გაუმართავთ
და სიზმრები როცა სთვლემენ სასთუმალთან...
საქართველოს მთებში გაგაჩინა ზენამ,
ხმათა ხავერდების და ღმერთების ენავ!

შლეგი –  გიჟი, გადარეული

ჯაგი – ეკლიანი ბუჩქი, ჯაგნარი  – ჯაგნარი ადგილი, სადაც ჯაგებია;
 

სარკინეთი, სარკინე – ადგილია მცხეთაში არკინეთი, სარკინე