ავიაბაზა
ავიაბაზა – (ლათ. avis ჩიტი და ბერძ. básis ნაბიჯი, კვარცხლბეკი), მიწის (წყლის) ნაკვეთი, რომელზეც განლაგებულია სამხედრო ავიაციის საჰაერო ხომალდები (სტრატეგიული, ტაქტიკური და სატრანსპორტო ავიაციის თვითმფრინავები, შვეულმფრენები), აგრეთვე საწყობები და სარემონტო სახელოსნოები, რომლებშიც მოთავსებულია საომარი მოქმედებებისათვის საჭირო მატერიალური და ტექნიკური საშუალებები.
ავიაბაზის ძირითადი მახასიათებლებია: ასაფრენ-დასაჯდომი ზოლების რაოდენობა და მათი სივრცითი ორიენტაცია (აფრენისა და დაჯდომის მაგნიტური კურსი); თითოეული ასაფრენ-დასაჯდომი ზოლის სიგრძე, სიგანე და მზიდუნარიანობა (სიმტკიცე); ავიაბაზაზე დისლოცირებული საჰაერო ხომალდების რაოდენობა, ტიპი და დანიშნულება; სხვადასხვა პარამეტრები, რომლებიც ახასიათებს საჰაერო მოძრაობის მართვის სისტემის მდგომარეობას, საჰაერო ხომალდებისა და ეკიპაჟების საბრძოლო მზადყოფნას, აეროდრომის ტექნიკური უზრუნველყოფის შესაძლებლობას და სხვ.
მსოფლიოში ცნობილი ავიობაზებია: „ედვარდსი“, „დევის მონტენ“ „ანდერსენი“ (აშშ); „კიპელოვო“, „ენგელსი“, „შაგოლ“ (რუსეთის ფედერაცია); „იოვილტონ“, „კალდროუზ“, „კოტესმორ“ (გაერთიანებული სამეფო დიდი ბრიტანეთი); „იოკოტა“ (იაპონია); „კანტ“, „მანას“ (ყირგიზეთის რესპუბლიკა); „ემარი-დელფი“ (ესტონეთის რესპუბლიკა); „ავორ“ (საფრანგეთის რესპუბლიკა); „ინდჟირლიკ“ (თურქეთის რესპუბლიკა); „პირლოუ“ (გერმანიის ფედერაციული რესპუბლიკა); „რამონ“ (ისრაელის სახელმწიფო); „ამენდოლა“ (იტალიის რესპუბლიკა); „შუიმენი“ (ჩინეთის სახალხო რესპუბლიკა); „ჩხუნჯუ“ (სამხრეთ კორეა); „ტასარ“ (უნგრეთი), „ერებუნი“ (სომხეთის რესპუბლიკა); „ჟეტიგენ“ (ყაზახეთის რესპუბლიკა) და სხვ.
