საბრძოლო მზადყოფნა
საბრძოლო მზადყოფნა – ჯარების (ძალების) მდგომარეობა, რომელიც საშუალებას აძლევს მათ დადგენილ ვადაში დაიწყონ საბრძოლო მოქმედებები და წარმატებით შეასრულონ დასახული ამოცანები.
ჩვეულებრივ, შეიარაღებულ ძალებში გათვალისწინებულია საბრძოლო მზადყოფნის რამდენიმე ხარისხი (დონე). მშვიდობიანობის დროს საბრძოლო მზადყოფნის ხარისხი უზრუნველყოფს ჯარების (ძალების) დროულ გადაყვანას მშვიდობიანიდან საომარ მდგომარეობაზე, მათ გაშლას და ომში ჩაბმას. შენაერთების, ნაწილების (ხომალდების) საბრძოლო მზადყოფნის ზრდა წარმოებს მათი თანამიმდევრული გადაყვანით საბრძოლო მზადყოფნის უდაბლესიდან უმაღლეს დონეზე. ასევე, უშუალოდ საბრძოლო მზადყოფნის უმაღლეს დონეზე გადაყვანით. ეს შეიძლება მოხდეს შუალედურის გამოტოვებით, გეგმით დადგენილ ვადებში ორგანიზაციული, სამობილიზაციო, ტექნიკური და სხვა ღონისძიებების კომპლექსის განხორციელებით. რაც უფრო მაღალია ჯარების (ძალების) საბრძოლო მზადყოფნის დონე, მით უფრო ნაკლები დრო ჭირდებათ მათ საბრძოლო ამოცანების შესასრულებლად მომზადებისათვის. საბრძოლო მზადყოფნის უმაღლეს დონეს განსაზღვრავს ჯარების (ძალების) უნარი, დაუყოვნებლივ შეასრულონ საბრძოლო ამოცანები.
