აღზევანს წავალ მარილზე
„აღზევანს წავალ მარილზე“ – აღმოსავლეთ საქართველოში გავრცელებული ურმული ლექს-სიმღერა. „აღზევანს წავალ მარილზე“ შინაარსით, წარმოშეობითა და ტრადიციით დაკავშირებულია ნატურალური მეურნეობის იმ ხანასთან, როცა საქართველოში მარილი ურმით შემოქონდათ თურქეთის საზღვარზე მდებარე კაგზმნიდან – ქართული გამოთქმით აღზევნიდან.
„აღზევანს წავალ მარილზე“ ვრცელ ვარიანტებში გადმოცემულია მეურმის ტრაგიკული თავგადასავალი. მკვლევარნი მას ხალხური შემოქმედების სხვადასხვა სახეს მიაკუთვნებენ; დ. არაყიშვილს საყოფაცხოვრებო გუნდურ სიმღერად მიაჩნია, ვ. კოტეტიშვილი კი საგაზაფხულო რიტუალს უკავშირებს. „აღზევანს წავალ მარილზეს“ ქართლსა და კახეთში ერთიმეორისაგან განსხვავებული მელოდიები აქვს. იგივე სათაური მისცა რ. ერისთავმა ურმულის ტრადიციაზე შექმნილ საკუთარ ლექსს.
ქ. სიხარულიძე
ლიტერატურა
- ვ. კოტეტიშვილი, ხალხური პოეზია, 1934;
- ქართული ხალხური სიმღერა, 1, რედაქტორ-შემდგენელი გრ. ჩხიკვაძე, 1960;
- თ. მამალაძე, შრომის სიმღერა კახეთში, 1962;
- თ. ოქროშიძე, ქართული ხალხური შრომის პოეზია, 1963.
