ბერიშვილი ზაქარია
ბერიშვილი ზაქარია (შაქრო) ივანეს ძე (დ. - 28.I.1887, თბილისი - გ. - 9.V.1965) - ქართველი რეჟისორი და მსახიობი. საქართველოს დამსახურებული მოღვაწე (1961). 1905-1921 იყო თეატრის მსახიობი.
გიორგი ჯაბადართან ერთად შექმნა თეატრალური სტუდია, რომელმაც დიდი როლი შეასრულა ახალგაზრდა მსახიობთა მომზადებაში. 1919 წლის 2 იანვარს არტისტული საზოგადოების თეატრში ქართული სტუდიის მიერ, ზ. ბერიშვილის და გ. ჯაბადარის რეჟისორობით, ქართველ მეომართა პატივსაცემად, ა. სუმბათაშვილის „ღალატი“ დაიდგა. 1920 წლის 26 ნოემბერს არტისტული საზოგადოების თეატრში საქართველოს ცენტრალურ კოოპერატივთა კავშირის დრამატულმა სტუდიამ ლ. ჯაკოს „ვითა ფოთლები“ წარმოადგინა. პიესის გამძღოლი ბერიშვილი იყო. 1920 წლის 14 მარტს მუშტაიდის კლუბში, შ. ბერიშვილის რეჟისორობით, ერისთავის „მეორედ გაყმაწვილება“ დაიდგა. 1920 წლის 13 აპრილს ნაძალადევის მუშათა კლუბში თბილისის კვანძის რკინიგზელთა სცენის მოყვარეთა წრის მიერ შ. ბერიშვილის რეჟისორობით წარმოდგენილი იქნა მხიარული კომედია „მაწანწალა სამოთხეში“. 1920 წლის 14 აპრილს იგივე წარმოდგენა გაიმართა ბავშვებისთვის.
საქართველოს გასაბჭოების შემდეგ (1921) მონაწილეობდა საქართველოს სსრ განათლების სახალხო კომისარიატის კინოსექციის ჩამოყალიბებაში. მუშაობდა რეჟისორის თანაშემწედ და ასისტენტად. შესრულებული აქვს ეპიზოდური როლები სხვადასხვა ფილმებში. ზ. ბერიშვილის პირველი დამოუკიდებელი ფილმია „იბრაჰიმ და გოდერძი” (1927), მანვე გადაიღო „ღრუბელთა თავშესაფარი” (1928), „საკანი №79” (1930), „ტანია ფრონტზე” (1931), „მდინარის გაღმა” (1935), „ცანის ხეობის საუნჯე” (1941).
მერაბ გეგია, სალომე ჭანტურიძე
ლიტერატურა
- ქსე, ტ. II, თბ., 1977; მ. კერესელიძე, ქართული ენციკლოპედიური ლექსიკონი, 2011;
- გაზ. „საქართველოს რესპუბლიკა“, 1919, №1, №267;
- ჟურ. „თეატრი და ცხოვრება“, 1920, №11, №15.
წყარო
საქართველოს დემოკრატიული რესპუბლიკა (1918-1921) ენციკლოპედია-ლექსიკონი
