ბოდვა განდიდების
ბოდვა განდიდების - (delusion of grandeur), პათოლოგიური დარწმუნებულობა საკუთარ მნიშვნელობაში (შესაძლებლობებში), განსაკუთრებულობაში ან უპირატესობაში (მაგ, მესიანობის ბოდვა), ხშირად თან ახლავს სხვა, ფანტასტიკური შინაარსის ბოდვითი აზრები. შესაძლოა სიმპტომი იყოს პარანოიის, შიზოფრენიის (ხშირად, მაგრამ არააუცილებლად – მისი პარანოიდული ფორმისას), მანიის, თავის ტვინის ორგანული პათოლოგიის – განსაკუთრებით, პროგრესული დამბლის კლინიკურ სურათში. (ჯმო-ს ფსიქიატრიის ლექსიკონები)
განდიდების ბოდვა შეიძლება ორ ჯგუფად დაიყოს: უნარებთან დაკავშირებული განდიდების ბოდვა და იდენტურობასთან დაკავშირებული განდიდების ბოდვა. პირველ შემთხვევაში სუბიექტი ფიქრობს, რომ ის თავისი არაჩვეულებრივი ნიჭიერების გამო რაღაც ძალის ან ბედის მიერ განსაკუთრებული მიზნისთვის არის არჩეული. მან შეიძლება იფიქროს, რომ სხვა ადამიანების აზრების კითხვა შეუძლია, რომ სხვებზე უფრო ჭკვიანია ან, რომ მისი გამოგონება ან მათემატიკური პრობლემის მისეული გადაწყვეტა იმდენად გენიალურია, რომ ადამიანების უმეტესობას მისი გაგება არ შეუძლია.
სუბიექტი, რომელსაც იდენტურობასთან დაკავშირებული ბოდვა ახასიათებს, დარწმუნებულია, რომ სახელგანთქმულ, მდიდარ ან გამოჩენილ ადამიანთა რიცხვს მიეკუთვნება. მას შეიძლება სჯეროდეს, რომ ის ბავშვობაში იპოვეს, ხოლო სინამდვილეში კი სამეფო ოჯახის წარმომადგენელია. (ოქსფორდის მოკლე სახელმძღვანელო ფსიქიატრიაში)
