გედეონი
გედეონი - (დაახლ. ძვ.წ. XIII-XII სს) – ისრაელის მსაჯული, ძველი აღთქმის ბიბლიური პერსონაჟი.
მისი მსაჯულობის პერიოდში ისრაელს რამდენიმე მტერი ჰყავდა, მათ შორის მადიამელებიც. მათთან ბრძოლაში დაიღუპა გედეონის ორი უფროსი ძმა. გედეონმა სამასკაციანი რაზმით ღამით შეუტია მადიამელთა და მათ მოკავშირეთა ბანაკს. ბიბლიის მიხედვით გედეონის ბრძანებით ებრაელი მეომრები ქოთნებს ამტვრევდნენ და ბუკს აყვირებდნენ მტრის ბანაკის მახლობლად. მადიამელებმა ეს აღიქვეს როგორც მტრის დიდი არმიის გამოჩენა, დაიბნენ და აირივნენ. გედეონმა სწრაფად შეუტია მათ და სასტიკად დაამარცხა. ამის შემდეგ მადიამელებმა მრავალი წლით მიატოვეს ქანაანის მიწა. მადლიერი ებრაელი ხალხი გედეონს მეფობას სთავაზობდა, მაგრამ მან უარი განაცხადა, რადგან ამაში თეოკრატიული პრინციპების დარღვევის საშიშროებას ხედავდა. მისი მსაჯულობა ისრაელზე 40 წელიწადი გაგრძელდა. გედეონმა ღრმა სიბერემდე იცოცხლა და მრავალრიცხოვანი ცოლებისაგან სამოცდაათი ვაჟი ეყოლა.
გედეონმა ებრაელებისაგან „იერობაალის“ სახელი მიიღო, რაც ბაალის მოწინააღმდეგეს ნიშნავს. ეს სახელი მას ბაალის კერპის მსხვერპლშესაწირის დანგრევისათვის ეწოდა.
