იეზეკიელი

იეზეკიელი – XI-XII საუკუნეების ზღვარზე მოღვაწე მწერალი, სასულიერო პოეტი, ფიქრობენ, რომ ბერი იყო. ანტონ I „წყობილსიტყვაობაში” (XVIII ს.) მას „საკვირველ პიიტიკოსს, ღმრთისმეტყუელ-რიტორს, ჭეშმარიტ ფილოსოფოსს” , იოანე პეტრიწისა და არსენ იყალთოელის „თანასწორად” მიიჩნევს. მას თვლიან იოანე პეტრიწის ლიტერატურული სკოლის წარმომადგენლად. ჩვენამდე მოღწეულია მისი სამი იამბიკო, აქედან ორი აკროსტიქულია.

მესამე იამბიკო (წმიდა სვიმეონს)

ნათელსა შორის უღამოსა მბრწყინავმან

დაუვალისა მზისა ელვარებითა

უმიმწუხრო, მართალთა საშვებელსა თან,

შვებულება მითხოვე უფლის, სვიმეონ,

მოსავსა შენსა მრწემსა იეზეკიელს

და აწისაცა ღელვიანისა ზღვისა

შფოთთა მშვიდობით ღირს მყავ განწიაღებად.

წყარო

ქართველი პოეტები (ენციკლოპედია)