ათათურქი მუსტაფა ქემალ
ათათურქი მუსტაფა ქემალ (Ataturk) (1881–1938) – თურქეთის სახელმწიფო, პოლიტიკური და სამხედრო მოღვაწე, მარშალი (1921), თურქეთის რესპუბლიკის დამაარსებელი და მისი პირველი პრეზიდენტი (1923–38). დაამთავრა გენერალური შტაბის აკადემია სტამბულში. მონაწილეობდა იტალია-ოსმალეთის (იტალია-ოსმალეთის ომი 1911–12), ბალკანეთის II (ბალკანეთის ომები) და I მსოფლიო ომებში. დიდი როლი შეასრულა დარდანელის დაცვაში ინგლის-საფრანგეთის ჯარებისაგან (1915).
1918–23 წლებში ხელმძღვანელობდა ოსმალეთის ეროვნულ-განმათავისუფლებელ რევოლუციას. 1920 წლიდან ახალი პარლამენტის – ოსმალეთის დიდი ეროვნული კრების თავმჯდომარე, 1921 წლიდან შეიარაღებული ძალების უმაღლესი მთავარსარდალი. მისი ინიციატივით 1922 წელს ოსმალეთში გაუქმდა მონარქია (ოსმალთა სასულთნო), ხოლო 1923 წლის 29 ოქტომბერს გამოცხადდა თურქეთის რესპუბლიკა.
