პროტევსი
პროტევსი – (ბერძნ.) პოსეიდონის დასის ზღვის ღვთაება. მოხუცი, რომელსაც შეეძლო სხვადასხვა სახის მიღება.
პროტევსი განაგებდა ეგვიპტის მახლობლად მდებარე კუნძულ ფაროსს, სადაც პოსეიდონისეულ სელაპებს მწყემსდა. მისი მეუღლე იყო ზღვის ქვიშის ქალღმერთი ფსამათე. პროტევსს წყლის სტიქიის სხვა ღვთაებათა მსგავსად წინასწარმეტყველების უნარიც გააჩნდა. „ოდისეაში“ მოთხრობილია მენელაოსის შინ დაბრუნების ამბავი. ტროადან მომავალი მიკენის მეფე ეგვიპტეში მოხვდა და ქარების გამო ვერ აგრძელებდა გზას. მას მეფის ასულმა გაუწია დახმარება: ასწავლა, თუ როგორ ემოქმედა პროტევსის წინაშე, რათა მისგან მიეღო რჩევა. მენელაოსმა დაიჭირა მიძინებული პროტევსი და მიუხედავად იმისა, რომ იგი ლომად, დრაკონად, ჯიქად, წყლად და ხედ გარდაისახა, მანამ არ გაუშვა ხელი, ვიდრე საწადელს არ მიაღწია. პროტევსმა მენელაოსს შინ დასაბრუნებელი გზაც მიასწავლა და ტროას ლაშქრობის მონაწილეთა ბედიც ამცნო.
კლასიკურ ეპოქაში ბერძნებს მიაჩნდათ, რომ პროტევსი ძველი ეგვიპტის მეფე იყო.
თანამედროვე მეტყველებაში სიტყვა „პროტევსი“ მრავალსახეობის აღმნიშვნელია.
