საარტილერიო დაზვერვა
საარტილერიო დაზვერვა – ტაქტიკური და ოპერატიული დაზვერვის შემადგენელი ნაწილი; მოწინააღმდეგის ობიექტების (მიზნების) შესახებ ცნობების მოპოვება საარტილერიო ცეცხლის მომზადების და წარმოების, სარაკეტო დარტყმების მიყენების ინტერესებისათვის; სარაკეტო და სახმელეთო ჯარების არტილერიის საბრძოლო და ოპერატიული უზრუნველყოფის სახეობა.
საარტილერიო დაზვერვის ამოცანებია:
- აღმოაჩინოს და განსაზღვროს მოწინააღმდეგის არტილერიის პოზიციების კოორდინატები, უწინარეს ყოვლისა – ბირთვული საბრძოლო მასალების გამომყენებლის.
- მაღალი სიზუსტის იარაღის ელემენტების, საჰაერო თავდაცვის საშუალებების, ტანკების, ქვეითი ჯარის საბრძოლო მანქანების, ჯავშანტრანსპორტიორების, ტანკსაწინააღმდეგო და სხვა საცეცხლე საშუალებების, მართვის სისტემების ობიექტების და რადიოტექნიკური საშუალებების კოორდინატები;
- აწარმოოს დასაზიანებლად შერჩეული ობიექტების (მიზნების) დამატებითი დაზვერვა;
- შეაგროვოს (დააზუსტოს) მონაცემები ადგილმდებარეობისა და მეტეოპირობების შესახებ;
- კონტროლი გაუწიოს თავისი არტილერიის (ნაღმსატყორცნების) სროლისა და ტაქტიკური რაკეტების დარტყმების შედეგებს;
- განსაზღვროს მონაცემები ცეცხლის კორექტირებისათვის.
საარტილერიო დაზვერვის საწარმოებლად იქმნება სათვალთავლო, სამეთაურო-სათვალთვალო და მოძრავი სადაზვერვო საარტილერიო პუნქტების, დაზვერვის ტექნიკური საშუალებების საგუშაგოების (პოზიციების) ქსელი. საარტილერიო დაზვერვა იყოფა ბგერით, ოპტიკურ, რადიოლოკაციურ და რადიოტექნიკურ სახეობებად. მისი ამოცანების შესასრულებლად იყენებენ აგრეთვე სადეზვერვო-საკორექციო ვერტმფრენებს. ამისთვის ცალკეული ამოცანების შესასრულებლად იქმნება საარტილერიო დაზვერვის ჯგუფები.