სამხედრო კადრები
სამხედრო კადრები – სამხედრო პროფესიონალები, შეიარაღებული ძალების პირადი შემადგენლობის ყველაზე კვალიფიცირებული ნაწილი, რომელსაც, აქვს შესაბამისი სამხედრო (სამხედრო-სპეციალური) მომზადება და სხვადასხვა საჯარისო ფორმირების, დაწესებულების, სამსახურის ხელმძღვანელობის, სწავლებისა და აღზრდის გამოცდილება; განკუთვნილი არიან შეიარაღებულ ძალებში სხვადასხვა სამხედრო-ტექნიკური და სპეციალური ფუნქციის შესასრულებლად. სამხედრო კადრები შეიძლება იყვნენ მოქმედ შემადგენლობაში (სამხედრო კადრების ძირითადი ნაწილი) ან რეზერვში (თადარგში). უმეტესი ქვეყნების შეიარაღებულ ძალებში სამხედრო კადრებს განეკუთვნებიან, უწინარეს ყოვლისა, ოფიცრები, ზემდეგები და მიჩმანები; უფრო ფართო თვალსაზრისით – ყველა სამხედრო მოსამსახურე, რომელიც სამხედრო სამსახურს გადის კონტრაქტით, ასევე სამხედრო სპეციალისტები შეიარაღებული ძალების სამოქალაქო პერსონალის შემადგენლობიდან.
