ტაბაწყურის ტბა
ტაბაწყურის ტბა – ტბა სამცხე-ჯავახეთის მხარეში, ბორჯომისა და ახალქალაქის მუნიციპალიტეტების საზღვარზე.
სადაც ახლა ტბაა, იმ ადგილას ხმელეთი ყოფილა, ხმელეთზე სოფელი ყოფილა გაშენებული, სოფელში ცხოვრობდა ერთი ქალი, რომელსაც ჰყავდა პატარა ბავშვი აკვნით, ერთ ხარება დღეს ეს ქალი საქსლეში იჯდა და ქსოვდა. მას გამოეცხადა იესო ქრისტე და უთხრა: ქალო, რა დღეა დღესო? – რა დღეა და ხარებაო, – უპასუხა ქალმა. ქრისტემ კიდევ გაუმეორა: ქალო, რა დღეა დღეს? – ხარებაო, – კვლავ უპასუხა ქალმა, ქრისტე მესამეჯერაც შეეკითხა, ქალმა უპასუხა: ხარება და ხარხარება, ჩემი ქმარ-შვილის გახარება. ამის შემდეგ ქრისტემ ფეხი დაჰკრა მიწას და სახლში ოთხივე მხრიდან წყალი ამოვიდა, წყალმა იმატა, იმატა და სახლი ტბაში ჩაიძირა, რომელშიც დარჩა ქალი თავისი პატარა ბავშვით. მას შემდეგ ყოველ ხარება დღეს ტბა იწმინდება და ამ ტბიდან ქალი და ბავშვიანი აკვანი ამოცურდება, რათა კვლავ წყალში ჩაიძიროს.
