ტარპეა
NPLG Wiki Dictionaries გვერდიდან
ტარპეა – (რომ.) ასული იმ რომაელი მთავარსარდლისა, რომელსაც საბინებთან ბრძოლის ჟამს კაპიტოლიუმის ბორცვზე მდებარე ციხე-ბურჯის დაცვა ევალა.
საბინთა მეფემ მოისყიდა ტარპეა. აღუთქვა, რომ მისცემდა ყველაფერს, რაც კი ხელთ ექნებოდათ საბინ მეომრებს. ტარპეა ოქროს სამაჯურებს მოელოდა და ამ იმედით ციხის კარები გახსნა. საბინმა მეომრებმა, ხელთ რომ ჰქონდათ, იმ ფარებით ჩაქოლეს მოღალატე რომაელი.
სხვა მითოსი გვამცნობს, რომ ტარპეა რომულუსის ბრძანებით გადააგდეს კლდიდან. ამ კლდეს ტარპევსი („ტარპეასეული“) ეწოდა და მოგვიანებით იქიდან დამნაშავეების გადაგდებაც იწყეს.
