ფუტკრის ოჯახი
NPLG Wiki Dictionaries გვერდიდან
ფუტკრის ოჯახი - ერთ მთლიანობად შეკავშირებული რთული ორგანიზმია, რომელიც რამდენიმე ათას ფუტკარს შეიცავს. ინდივიდების ერთიანობის წყალობით ფუტკრის ოჯახს შეუძლია ბუდეში შეინარჩუნოს ოპტიმალური ტემპერატურა, მოაგროვოს დიდი რაოდენობით თაფლი და ყვავილის მტვერი, თავი დაიცვას მტრებისაგან, გამრავლდეს. ფუტკრის თითოეულ ოჯახს აქვს ინდივიდუალური თავისებურებანი: სპეციფიკური სუნი, თაფლის შეგროვების და ცვილის გამოყოფის უნარი, ზამთარგამძლეობა, ნაყრიანობა, გადამდები დაავადებებისადმი მდგრადობა და სხვა. ფუტკრის ოჯახი ნორმალურად ცხოვრობს და ვითარდება მხოლოდ მთლიანობაში. ფუტკრის ოჯახის თითოეული ინდივიდი დედა ფუტკარი, მუშა ფუტკარი, მამალი ფუტკარი განსაზღვრულ ფუნქციას ასრულებს, რაც მიმართულია ოჯახის მთლიანობისა და არსებობის შესანარჩუნებლად.
