მატრიცის რანგი

მატრიცის რანგი – მოცემული მატრიცა ნულისაგან განსხვავებული მინორების რიგებს შორის უდიდესი; ეს ნიშნავს, რომ თუ მატრიცის რანგი k-ს ტოლია, მაშინ ამ მატრიცის k რიგის მინორებს შორის ერთი მაინც განსხვავებულია ნულისაგან, ხოლო k+1 და უფრო მაღალი რიგის მინორები ყველა ნულის ტოლია.

მართებულია თეორემა: მატრიცის რანგი ტოლია წრფივად დამოუკიდებელი სტრიქონების (ან სვეტების) უდიდესი რაოდენობისა.

მატრიცის ელემენტარული გარდაქმნების დროს მისი რანგი არ იცვლება.

მატრიცის რანგის ცნება შემოიღო სილვესტრმა (დაახლ. 1850), მაგრამ მისთვის სახელი არ დაურქმევია (ამ უყურადღებობის ახსნა ძნელია, ვინაიდან სილვესტრს უყვარდა ახალი ტერმინების შემოღება). ტერმინი მოგვიანებით შემოიღო ფრობენიუსმა, გერმანული სიტყვიდან Rang – „ხარისხი“, „თანრიგი“. დეტერმინანტის რანგი განსაზღვრა და მას Rang უწოდა კრონეკერმა (1880). იმ განტოლებათა სისტემის ამოხსნადობის პირობა, რომლის რანგი ტოლია განტოლებათა რიცხვისა, მოგვცა ჰეგერმა (1858). ჯგუფის რანგის ცნება და სახელწოდება შემოიღო კილინგმა.

წყარო

მათემატიკის ენციკლოპედიური ლექსიკონი