აბასთუმანი (კურორტი)

აბასთუმნი – სამთო-კლიმატური კურორტი მესხეთის ქედის სამხრეთ კალთებზე, ზღვის დონიდან 1250-1450მ-ზე მდინარე ოცხეს ღრმა და ვიწრო ხეობაში. ჩრდილოდასავლეთიდან დაცულია ზეკარის ქედით. ხეობა და მისი გარემომცველი ფერდობები დაფარულია წიწვოვანი ტყით (ძირითადად ნაძვი, ფიჭვი, სოჭი). კლიმატი ძირითადად განპირობებულია რელიეფის მაღალი ჰიფსომეტრიული მდებარეობით და სირთულით. ზამთარი ზომიერად რბილია, ზომიერად თოვლიანი; მყარი თოვლის საფარი შენარჩუნებულია დეკემბრის შუა ნაწილიდან, მარტის შუა ხანებამდე. გაზაფხული მოკლეა, ხასიათდება არამდგრადი ამინდებით. ზაფხული ზომიერად თბილია; საშუალო ტემპერატურა აგვისტოში 16 გრადუსია. შემოდგომა გრძელი, თბილი, მშრალი და მზიანია. ნალექები დაახლოებით 600მმ წელიწადში, მზის ნათების რაოდენობა წელიწადში 1970 საათია. ძლიერი ქარები როგორც წესი არ არის, რელიეფის ხასიათიდან გამომდინარე; სუსტი და ზომიერი მთა-ხეობის ქარები უზრუნველყოფენ კარგ ვენტილაციას. ჰაერი ძალზედ სუფთა, გამჭვირვალე და წიწვოვანი ტყის არომატით არის გაჯერებული.

მთის კლიმატი კურორტის ძირითადი სამკურნალო ფაქტორია, კლიმატოთერაპიის ჩასატარებლად მთელი წლის განმავლობაში. ამასთან კურორტი ფლობს თერმული (41-48 გრად) წყლების მნიშვნელოვან მარაგს (ცხელი წყაროები აქ ცნობილი იყო ჯერ კიდევ XI საუკუნეში). სამი წყაროს დებიტი (ბოგოტირის, გველის და ოქროს) შეადგენს 1 მლნ. ლიტრს წუთში. ცალკე აღნიშვნის ღირსია ყანობილის მთაზე ზღვის დონიდან 1650მ-ზე მდებარე აბასთუმნის ასტროფიზიკური ობსერვატორია.

წყრო

სამცხე-ჯავახეთის რეგიონის რელიეფი და გეოდინამიკური პროცესები