აბაშიძე ვლადიმერ
აბაშიძე, ვლადიმერ [ლადო] სვიმონის ძე (1849 – 1917, 9/VI) – პოეტი და თეატრალური მოღვაწე, მგოსანი ქალის, ნინო ორბელიანის (1838–1919) ძმა. დაიბადა სოფ. დილიკაურში. დაამთავრა თბილისის I გიმნაზია (1867).
1867 წლიდან ნ. ავალიშვილის მიერ ჩამოყალიბებულ სცენისმოყვარეთა წრეში მხურვალე მონაწილეობას იღებდა და თვალსაჩინო ძალადაც ითვლებოდა. 1872 წლიდან პროვინციაში (საჩხერეში, ფოთში, სენაკში, აბაშაში) ჯერ მომრიგებელმოსამართლედ მუშაობდა, შემდეგ – მაზრის უფროსის თანაშემწედ. ამ პერიოდში ხშირად მართავდა წარმოდგენებს. წერდა ლექსებსაც. მას ეკუთვნის დიდად გავრცელებული, კომპოზიტორ ანდრია ყარაშვილის მიერ ნოტებზე გადაღებული სიმღერა „ისევ შენ და ისევ შენ, ჩემო ტურფა, ლამაზო“ [პირველად, ავტორის აღუნიშნავად, 1878 წელს გაზ. „დროებაში“ გამოქვეყნდა, შემდეგ – სხვადასხვა კრებულში], რომლის მღერითაც ვანო სარაჯიშვილს მსმენელი აღტაცებაში მოჰყავდა.
- წყარო:
- საქართველოს სახელმწიფო სათეატრო მუზეუმი;
- ირემაძე, ქეთევან. ლიტერატურული მედალიონები. – თბ.: საბლიტგამი, 1945. – გვ. 231-235.
