ბერბეჯი რიჩარდ
რიჩარდ ბერბეჯი – (1567-1619) ინგლისელი მსახიობი, ინგლისელ მსახიობთა და თეატრალურ მოღვაწეთა ოჯახის წარმომადგენელი, ჯეიმს ბერბეჯის შვილი და ქათბერთ ბერბეჯის ძმა; აღორძინების ეპოქის უთვალსაჩინოსი წარმომადგენელი, მოღვაწეობდა თეატრში „გლობუსი”. შექსპირის პიესებში ის მთავარ როლებს ასრულებდა. „ის მომხიბლავი იყო. ისეთი სრულყოფით გარდამსახველი თავის როლში, თითქოს საკუთარ არსებას საკუთარ ტანისამოსთან ერთად იშორებდა. იგი არასოდეს გადადიოდა თავის თავში, ვიდრე პიესა არ დამთავრდებოდა...…მას ჰქონდა ყველა მონაცემი ჩინებული ორატორისა, რომელიც თითოეულ სიტყვას აცოცხლებდა წარმოთქმის დროს, ხოლო თავის მეტყველებას – მოძრაობით. მისი მსმენელნი მოჯადოებული იყვნენ, ვიდრე ის მეტყველებდა და წუხდნენ, როცა დადუმდებოდა. მაგრამ, უკანასკნელ შემთხვევაშიაც იგი ჩინებულ მსახიობად რჩებოდა და არასდროს არ გამოდიოდა თავისი როლიდან, მაშინაც კი, როცა ლაპარაკს ამთავრებდა და მთელი თავისი გამოხედვით და ჟესტებით მუდამ როლის შესრულების სიმაღლეზე რჩებოდა”
მას ჰქონდა არაჩვეულებრივი ტრაგედიული ნიჭი, შექსპირმა მისთვის დაწერა რიჩარდ III, ჰამლეტის, ოტელოს, ლირის, მაკბეტის, პროსპეროს (და სხვ.) როლები. თანამედროვეთა შეფასებანი მეტყველებენ, რომ იგი იყო დიდი ოსტატი, ჰქონდა არაჩვეულებრივი გარდასახვის უნარი, გამომსახველი დეკლამაცია, შესანიშნავად დამუშავებული მიმიკა და ჟესტი.
