დიადუმენოსი (ქანდაკება)
დიადუმენოსი – (გამარჯვებულის გვირგვინით [ლენტით] თავშემკული), ძველი ბერძენი მოქანდაკის პოლიკლეტოსის ქანდაკება რომელიც ჩვენთვის ცნობილია მარმარილოს რომაული ასლით.
ჭაბუკია წარმოდგენილი კონტრაპოსტით, რომელიც თავზე გამარჯვებულის ლენტს იკრავს. ქანდაკებაში, რომელიც „დორიფოროსზე“ ოდნავ გვიანაა შექმნილი (დაახლოებით ძვ.წ. 420-410 წწ.), ჩვენ ვხედავთ, რომ პოლიკლეტოსის შემოქმედებაში, ძირითადი პრინციპების მდგრადობის მიუხედავად გარკვეული ცვლილებები ხდება. ფიგურის პროპორცია აშკარად უფრო წაგრძელებულია, ვიდრე ეს „დორიფოროსის“ შემთხვევაში იყო, ფიგურა მთლიანობაში უფრო მსუბუქია, მისი სილუეტი კი ბევრად უფრო მოქნილი და მოხდენილია, აქედან გამომდინარე კი ოდნავ შეცვლილია საერთო შთაბეჭდილებაც. პოლიკლეტოსის ადრეული ქანდაკებისათვის დამახასიათებელ ჰეროიზმს „დიადუმენოსში“ გარკვეულწილად სახის ერთგვარი ლირიკულობა ჩაენაცვლება.
