დიდი წერეთის კოშკი (ცილინდრული)
დიდი წერეთის კოშკი - კოშკი მდებარეობს საქართველოში, შიდა ქართლის მხარეში, გორის მუნიციპალიტეტში, მისგან სამხრეთით 42 კილომეტრში, ტანას მარჯვენა შენაკადის მდინარე თხინალას ხეობაში მდებარე სოფელ დიდი წერეთის დასავლეთით, ხეობაში, ძველ ნასახლარებთან, ღვთისმშობლის ეკლესიის ახლოს. თარიღდება XIV-XV საუკუნეებით (აგებულია ცეცხლსასროლი იარაღის შემოღებამდე).
აღწერილობა
კოშკი ცილინდრულია, (შიდა დიამეტრი 3,5 მ. კედლის სისქე 1,4 მ), ზევით ოდნავ ვიწროვდება, ნაგებია ნატეხი ქვით. ძლიერ დაზიანებულია: შემორჩენილია ოთხი სართული და მეხუთე სართულის (თუ ბანის) კედლების მცირე ფრაგმენტები. ჩანგრეულია სართულშუა ხის გადახურვები. შესასვლელი სამხრეთით, მეორე სართულზეა, მიწიდან ოთხიოდე მეტრზე. კარი სწორკუთხაა. ამ სართულს აქვს ერთი სარკმელი და ხის აივანი. კოშკის პირველი სართული ნანგრევებით არის სავსე. მესამე სართულზე, სამხრეთით და ჩრდილო – აღმოსავლეთით თითო პატარა სარკმელია. მეოთხე სართულს ერთმანეთისაგან თანაბრად დაშორებული ოთხი სარკმელი აქვს (ერთი სანახევროდ დანგრეულია).
