ვაგანტები
NPLG Wiki Dictionaries გვერდიდან
ვაგანტები – (ლათ. vagantes – მოხეტიალე), შუასაუკუნეების მოხეტიალე მომღერალ-მთქმელები, რომლებსაც მიტოვებული ჰქონდათ სასულიერო სემინარია ან ჩამორთმეული მღვდელმსახურების უფლება. შესრულების თავისებურებით ჩამოჰგავდნენ ჰისტრიონებს.
ვაგანტები პოპულარულები იყვნენ მთელს ევროპაში. თავის სატირულ, თავისუფლებისმოყვარე სიმღერებში, რომლებსაც ისინი ასრულებდნენ ლათინურ ენაზე, ხოტბას ასხამდნენ მიწიერ სიამოვნებებს, სიყვარულს, ღვინოს, მხიარულებას. მათ სიმღერებში ხმიანდებოდა ანტიკური პოეზია და ხალხური მელოდიები. ვაგანტების სუფრული სიმღერებიდან ჩამოყალიბდა მრავალი სტუდენტური სიმღერა, მათ შორის „გაუდეამუსი“. ეკლესიის მხრიდან სასტიკი დევნის გამო, მე-13 ს. ვაგანტებმა შეწყვიტეს მოღვაწეობა. მათი ერთი ნაწილი შეუერთდა პროფესიონალ ჰისტრიონებს.
