ვილარი ჟან
ჟან ვილარი – (ფრანგ. Jean Vilar, 1912-1971), ფრანგი მსახიობი, რეჟისორი, თეატრალური მოღვაწე.
1932 წელს მუშაობას იწყებს თეატრ „ატელიეში“, სადაც შ. დიულენის ხელმძღვანელობით ეუფლება მსახიობის და რეჟისორის ხელოვნებას. 1943 წ. ქმნის თავის თეატრს, 1945-51 წწ. მუშაობს სხვადასხვა თეატრებში რეჟისორად და მსახიობად. 1951 წლიდან არის ნაციონალური სახალხო თეატრის დირექტორი, რეჟისორი და მსახიობი. აარსებს ავინიონის დრამატული ხელოვნების ფესტივალს. თავისი შემოქმედებით ცდილობდა განეხორციელებია სახალხო თეატრის იდეა, წამოყენებული რ. როლანის და მისი მიმდევრების მიერ. მისი რეჟისურისათვის დამახასიათებელი იყო ძველი სამოედნო თეატრის პირობითი ხერხების შეხამება თეატრალური კულტურის უახლეს მიღწევებთან. მისი დადგმები გამოირჩეოდა სიცხადით, ფორმის ჰარმონიულობით, ნატიფი სანახაობრიობით. მის წარმოდგენებში თითქმის არ იყო დეკორაცია. უმთავრეს სადადგმო კომპონენტად იგი იყენებდა კოსტიუმებს, განათებას და მუსიკას. როგორც რეჟისურაში ისე სამსახიობო ხელოვნებაში თავის ნამუშევრებს ანიჭებდა მძაფრ თანადროულ ჟღერადობას.
