ზიუსი ედუარდ
ედუარდ ზიუსი – (нем. Eduard Suess; 1831-1914 წ.წ.), ავსტრიის გამოჩენილი გეოლოგი, რომლის შრომებმა დიდი გავლენა მოახდინა გეოგრაფიის მეცნიერებაზე. ზიუსს ეკუთვნის სამტომიანი კლასიკური ნაშრომი „დედამიწის სახე“, რომლის შინაარსს წარმოადგენს დედამიწის სფეროს დინამიკა მთელი მის მოცულობით, ე. ი. ტექტონიკა, ვულკანიზმი, ზღვის ტრანსგრესია და რეგრესია, საუკუნეთა განმავლობაში ორგანულ სამყაროსა და დედამიწის ზედაპირის ცვლილებანი და სხვ. ზიუსის შეხედულების თანახმად შენაოჭება მრავალი პერიოდის განმავლობაში ინარჩუნებს ერთიან მიმართულებას, რომელიც ჯერ კიდევ დასახული იყო კემბრიულამდელ პერიოდში. ზიუსმა შექმნა მთელი რიგი განმაზოგადებელი ტერმინები, რომელიც მიღებულია მეცნიერებაში: ევრაზია, ტეტისი, ირკუტსკის ამფითეატრი, კანადის ფარი, ბალტიის ფარი, აზიის უძველესი თხემი და სხვ.
