თელიფინუ
თელიფინუ – (ხეთ.) ამინდის ღმერთის თარუს ვაჟიშვილი. თელეფინუს მეუღლეა ხათეფინუ, ზღვის ღმერთის ქალიშვილი, ქამრუსეფას ქალიშვილი. თელიფინუ ქუხილისა და ელვის განმგებელია. იწვევს წვიმას. მფარველობს მცენარეულობას (ხნავს, მოჰყავს წყალი, ზრდის მარცვლეულს). ასევე განაგებს ცხოველებისა და ადამიანების ნაყოფიერებას.
როდესაც თელიფინე ბრაზდება, ტოვებს ქვეყანას და შორს მიდის. იწყება გაჭირვებისა და შიმშილის ხანა. დიდი თუ მცირე ღმერთები საგონებელში არიან ჩავარდნილნი. რა იღონონ? ყველა ღმერთი ეძებს თელიფინუს. ვერავინ ვერ მიაკვლია მას, ვერც არწივმა, რომელიც მის საძებრად გააგზავნეს ღმერთებმა. მაშინ ხანახანა, დიდი დედა, მოუხმობს პატარა ფუტკარს და დაავალებს თელიფინუს მოძებნას. ფუტკარი ქალაქ ლიხცინაში მიაგნებს მძინარე თელიფინუს, დაჩხვლეტს მას ნესტრით და გამოაღვიძებს. თელიფინუ განრისხდება – მდინარეებს მიმართულებას უცვლის, საქონელს ანადგურებს... ქამრუსეფას რიტუალის შემდეგ თელიფინუ ბრუნდება და იწყებს კვლავ ზრუნვას ქვეყნის აყვავებისა და გამრავლებისათვის.
