კუხიანიძე ზურაბ

ზურაბ კუხიანიძე

კუხიანიძე ზურაბ − (1930 − 2003), მწერალი, პოეტი, პუბლიცისტი. დაიბადა ქუთაისში. დაამთავრა ა. წულუკიძის სახელობის ქუთაისის პედაგოგიური ინსტიტუტის ფილოლოგიის ფაკულტეტი. 1954-1977 წლებში იყო ქუთაისის პიონერთა და მოსწავლეთა სასახლის დირექტორი, ხოლო 1977 წლიდან − გამომცემლობა „საქართველოს” ქუთაისის ფილიალის „უქიმერიონის” დირექტორი. მისი პირველი ლექსი გამოქვეყნდა 1951 წელს, 1958 წელს კი გამოიცა მისი პირველი კრებული. არის 40-მდე წიგნის ავტორი, მათ შორის: „კალიების კარნავალი” (1975), ლექსების, ბალადებისა და პოემების ერთტომეული (1980), „რაც ვთქვი, გულით ვთქვი” (1990). დაკრძალულია ქუთაისის მწვანეყვავილას პანთეონში.

* * *

აბრიალებს ციცქა თვალებს,

როგორც ცერზე მიმინო..

ჩვენ თუ არა, სხვა ვინ დალევს

ჭურისთავზე იმ ღვინოს.

მთაზე ციხე გადმომდგარა,

როგორც ცერზე მიმინო...

ვინც დამარცხდა, კარით - კარად

დარბოდა და ირბინოს.

საქართველოვ, ოღონდ ერთი

წყნარად ჩამიღიმილო, −

გასაფრენად მზად ვარ შენთვის,

როგორც ცერზე მიმინო!

წყარო

• ქართველი პოეტები (ენციკლოპედია)