მეტრეველი ლელა

ლელა მეტრეველი

მეტრეველი ლელა − (1955), ქიმიკოსი, პოეტი. დაიბადა ონში. დაამთავრა თსუ-ს ქიმიის, საზოგადოებრივ პროფესიათა და იურიდიული ფაკულტეტები. სხვადასხვა დროს მუშაობდა სტაბილური იზოტოპების სამეცნიერო-კვლევით ინსტიტუტში, საქართველოს მეცნიერებათა აკადემიის ფიზიკური და ორგანული ქიმიის ინსტიტუტში, საქართველოს ლტოლვილთა და განსახლების სამინისტროში, გამომცემლობა „დიოგენეში”. არის ქიმიის დოქტორი, ქიმიის მასწავლებელთა ასოციაციის თავმჯდომარე. გამოქვეყნებული აქვს 20-მდე სასკოლო სახელმძღვანელო ქიმიაში. ლელა მეტრეველს დღემდე გამოცემული აქვს ლექსების 5 კრებული და ერთი ზღაპარი. სხვადასხვა გამოცემაში დაბეჭდილი აქვს რუსული, ფრანგული და იაპონური პოეზიის თარგმანები. არის ალმანახ „ამერ-იმერის” პასუხისმგებელი მდივანი.

ანდაზების თემაზე

წყალნი წავლენ და წამოვლენ როცა,

თქვენ ხომ დარჩებით მაინც, ქვიშანო?!

თორემ ირგვლივ სულ არავინ მოჩანს,

ამ ბეწვის ხიდზე რომ გაგიყვანოს.

ჟამი, უღრუბლო დღეთა მპარავი,

არც მოგკლავს და არც ცოცხლად დაგარჩენს...

არც გეგულება ქვეყნად არავინ,

რომ ჩამოეყრდნო, როგორც ყავარჯენს.

მოჰგავხარ ბატკანს − მგლების არჩივი,

ან ფოთოლს, ხევში ქარით ჩანატანს

და ეჭიდები ლექსებს ხავსივით,

რადგანაც ირგვლივ ხავსიც არა ჩანს.

წყარო

ქართველი პოეტები (ენციკლოპედია)