მცირე მურტალა
აღწერილია 12 ქვესახეობა. საქართველოში მოიპოვება ფრთათეთრი მცირე მურტალა – P. r. capensis Salvadori, 1884.
სარჩევი |
გავრცელება
სახეობის ბუდობის არეალი მეტად ვრცელია. მოიპოვება სამხრეთ და შუა ევროპაში, ჩრდილოეთ და სამხრეთ აფრიკაში, მადაგასკარზე, წინა, შუა და სამხრეთ-აღმოსავლეთ აზიაში, ზონდისა და ფილიპინის კუნძულებზე, ახალ გვინეაში, ავსტრალიაში და ტასმანიაზე. სსრ კავშირში ბუდობს ევროპული ნაწილის სამხრეთ რაიონებში, შუა აზიაში და უსურის აუზში. ზამთრობს სამხრეთ უკრაინაში, მათ შორის ყირიმშიც, აგრეთვე ამიერკავკასიაში. საქართველოში ცნობილია როგორც მობინადრე ფრინველი.
ბიოტოპი
ბუდობის პერიოდში ბინადრობს პატარა დამდგარ, მეტწილად მტკნარ წყალსატევებზე ან მდორე მდინარეებზე, სადაც უხვადაა განვითარებული წყლის მცენარეულობა – ლელი, ისლი, ჭილი და სხვ. და აქვთ შლამიანი ფსკერი. აღმოსავლეთ საქართველოში მოიპოვება ზოგიერთ მლაშე ტბაზეც. ბუდობის დამთავრების შემდეგ გვხვდება მდინარეთა შესართავებსა და ზღვების სანაპირო ზოლში.
გამრავლება
მაისში აკეთებს წყლის მცენარეებისაგან მცურავ ბუდეს, ჩვეულებრივად ნაპირიდან მოშორებით. დებს 4-5 კვერცხს. კრუხად მორიგეობით ჯდება ორივე მშობელი. საინკუბაციო პერიოდი 19-20 დღემდე გრძელდება.
კვება
ძირითადი საკვებია მწერები და მათი მატლები, ჭიები, წვრილი მოლუსკები და კიბოსნაირები.
მნიშვნელობა
პრაქტიკული მნიშვნელობა არა აქვს.
