ორგაზმული დისფუნქცია
ორგაზმული დისფუნქცია - (F52.3), (orgasmic dysfunction) - სექსუალური დისფუნქცია, რომლის დროსაც ორგაზმი არ მიიღწევა ან მისი დადგომა საგრძნობლად შეფერხებულია. (ჯმო-ს ფსიქიატრიის ლექსიკონები)
სარჩევი |
ორგაზმული დისფუნქცია ქალებში
ბევრი ქალი ორგაზმს ვაგინალური აქტის დროს რეგულარულად ვერ აღწევს, მაგრამ ამას კლიტორის სტიმულაციით ახერხებს. საკითხავია, უნდა ჩაითვალოს თუ არა აშლილობად ქალის უუნარობა რეგულარულად მიაღწიოს ორგაზმს (Heiman, 2002ბ). ზოგიერთი ქალი ამას პრობლემად მიიჩნევს და რჩევასა და დახმარებას ითხოვს.
გამოკვლევა
ზოგად გამოკვლევასთან ერთად, მნიშვნელოვანია შემდეგი კითხვების დასმა: როდესმე ჰქონია თუ არა ქალს ორგაზმი? თუ ეს ასეა, ჰქონია თუ არა ორგაზმი პარტნიორთან სექსუალური აქტის დროს, მასტურბაციის დროს, თუ რაიმე სახის ფანტაზიის შედეგად?
ამ პრობლემის მიზეზი შეიძლება იყოს ისეთი წამლების გამოყენება, როგორიცაა სუსი-ები (სეროტონინის უკუმიტაცების სელექციური ინჰიბიტორები), სხვა ანტიდეპრესანტები და ანტიჰიპერტენზიული საშუალებები.
მკურნალობა
პარტნიორს სთავაზობენ „აგზნების კერის” ტექნიკის გამოყენებას ქალებმა შეიძლება მიმართონ თვითსტიმულაციას, ხელით ან ვიბრატორით ან კლიტორის ჰიპერემიის გაზრდას ვაკუუმის აპარატის გამოყენებით (Billups, 2002). ნებისმიერი მიდგომის გამოყენებისას, პაციენტს უნდა გავუწიოთ დახმარება განურჩევლად იმისა, თუ როგორია მისი ურთიერთობები და პრობლემები.
მამაკაცთა ორგაზმული დისფუნქცია
ეს ტერმინი აღნიშნავს დაგვიანებულ ეაკულაციას ან მის არარსებობას. ჩვეულებრივ, ეს პრობლემა თავს იჩენს მხოლოდ კოიტუსის დროს, მაგრამ ის შეიძლება მასტურბაციის დროსაც იჩენდეს თავს. ის, ჩვეულებრივ, ასოცირებულია საერთო ფსიქოლოგიურ ინჰიბიციასთან სექსუალურ ურთიერთობებში, მაგრამ, ასევე, შეიძლება იყოს გამოწვეული ისეთი მედიკამენტებით, როგორებიცაა ანტიფსიქოზური პრეპარატები, მონოამინ ოქსიდაზას ინჰიბიტორები და სეროტონინის უკუმიტაცების შერჩევითი ინჰიბიტორები.
(ოქსფორდის მოკლე სახელმძღვანელო ფსიქიატრიაში)
სინონიმი
- შეკავებული ორგაზმი მამაკაცებში/ქალებში
- ფსიქოგენური ანორგაზმია
