პედოფილია
პედოფილია - (F65.4), (paedophilia), აშლილობა (პარაფილია), რომლის დროსაც სექსუალური ობიექტების არჩევისას უპირატესობა ენიჭება ბავშვებს – ხშირად პრეპუბერტატული ან ადრეული პუბერტატული ასაკის გოგონებს ან ბიჭებს, ხანდახან – ორივეს. (ჯმო-ს ფსიქიატრიის ლექსიკონები)
ეს პათოლოგია, ფაქტიურად, მხოლოდ მამაკაცებში გვხვდება. პედოფილია უნდა გავმიჯნოთ სექსუალური ურთიერთობისგან იმ ახალგაზრდებთან, რომლებმაც სქესობრივ სიმწიფეს მიაღწიეს, მაგრამ ჯერ არ აქვთ ლეგალური უფლება თანხმობა განაცხადონ სექსუალურ ურთიერთობაზე (ეს ასაკი განსხვავებულია სხვადასხვა კანონმდებლობაში). პედოფილია არ არის დაკავშირებული თანხმობის გაცემის იურიდიული უფლების დასაშვებ ზღვართან, არამედ, დაკავშირებულია სექსუალურ ურთიერთობებთან ზრდასრულ ადამიანსა და სქესობრივად მოუმწიფებელ ბავშვს შორის.
სარჩევი |
გავრცელება
არ არსებობს სარწმუნო ინფორმაცია პედოფილიის გავრცელების სიხშირის თაობაზე. თუმცა გარკვეული მონაცემების მიხედვით (ზოგიერთი ქვეყნის მონაცემები ბავშვთა პროსტიტუციის შესახებ; გასაყიდი პორნოგრაფიული მასალა სექსის შესახებ მცირეწლოვან ბავშვებთან; ინტერნეტსაიტებზე განთავსებული მასალა), ის იშვიათობას არ უნდა წარმოადგენდეს. ცხადია, რომ ინტერესი ბავშვებთან სექსუალური კონტაქტის მიმართ საკმაოდ გავრცელებული მოვლენაა, თუმცა, პედოფილია, როგორც სექსუალური ქცევის ერთადერთი ფორმა, ალბათ იშვიათობას წარმოადგენს.
აღწერა
პედოფილები, ჩვეულებრივ, ირჩევენ ბავშვს, რომელთა ასაკი მერყეობს 6 წლიდან სქესობრივი მომწიფების ასაკამდე, თუმცა, ზოგიერთი ინტერესს იჩენს უფრო მცირეწლოვანი ბავშვების მიმართ. ბავშვი შეიძლება იყოს იგივე (ჰომოსექსუალური პედოფილია) ან საპირისპირო სქესის (ჰეტეროსექსუალური პედოფილია). ზოგი პედოფილი ბავშვს თავის სანათესაოში ან სამსახურში პოულობს, ზოგი კი უცნობ ბავშვებს იმეგობრებს. მიუხედავად იმისა, რომ პედოფილების დიდი ნაწილი, რომელიც დახმარებისთვის ექიმს მიმართავს, საშუალო ასაკის მამაკაცებისაგან შედგება, პედოფილია ადრეულ ასაკში ვითარდება. არ არსებობს იმის მტკიცებულება, რომ მყარი ინტერესი მოზრდილი სექსუალური პარტნიორების მიმართ იცვლება ინტერესით ბავშვი პარტნიორების მიმართ. პატარა ბავშვებთან სექსუალური კონტაქტი უფრო მოფერება ან მასტურბაციაში ვლინდება, ვიდრე სრულ კოიტუსში. თუმცა, ზოგჯერ, პატარა ბავშვებს ზიანს აყენებენ იძულებითი პენეტრაციის დროს. არსებობს პედოფილიის იშვიათი და ტრაგიკული შემთხვევები, რომლებიც სექსუალურ სადიზმთანაა ასოცირებული.
დიფერენციალური დიაგნოსტიკა
პედოფილია უნდა გავმიჯნოთ ექსჰიბიციონიზმისაგან გოგონების წინაშე, რომლის დროსაც არ შეინიშნება უშუალო სექსუალური კონტაქტის დამყარების მცდელობა. ზოგჯერ, ბავშვებთან სექსუალური კონტაქტის დამყარების მცდელობა დემენციისა და ნორმაზე დაბალი ინტელექტის მქონე ადამიანებს და ალკოჰოლიკებს ახასიათებთ.
ეტიოლოგია
უცნობია. პედოფილებს ხშირად ახასიათებთ ზრდასრულ ადამიანებთან ურთიერთობის დამყარების უუნარობა და ქალებთან ურთიერთობის შიში.
პროგნოზი
იმის გამო, რომ არ არსებობს შემდგომი დაკვირვებით მიღებული სანდო ინფორმაცია, თითოეულ შემთხვევაში პროგნოზი კეთდება ისტორიის ხანგრძლივობიდან, პედოფილური ქცევის სიხშირიდან და პიროვნული სისუსტიდან და სიძლიერიდან გამომდინარე. კიდევ ერთი ინდიკატორია სოციალური და სექსუალური კონტაქტების არარსებობა. ქცევა, რომელიც ხშირად მეორდება, სავარაუდოდ, შენარჩუნდება მკურნალობის მიუხედავად.
მკურნალობა
არ არსებობს მონაცემები რომელიმე სახის მკურნალობის ეფექტურობის შესახებ.
