პითაგორე რეგინელი
პითაგორე რეგინელი – (ძვ. ბერძ. Πυθαγόρας ο Ρήγιος), ადრეული ბერძნული კლასიკის ძველი ბერძენი მოქანდაკე. პითაგორე რეგინელი კუნძულ სამოსზე დაიბადა, მაგრამ შემდეგ სამხრეთ იტალიაში (კ. რეგინაზე) მოღვაწეობდა და ამან გარკვეული ასახვა პოვა მის შემოქმედებაში. ეს მეტად თავისებური მანერის მქონე, ნოვატორი-მოქანდაკე ადამიანის განცდისა და ვნებათაღელვის გადმოცემის უჩვეულო ოსტატადაა აღიარებული. პითაგორე რეგინელი იყო უბადლო ოსტატი ადამიანის სხეულის ცალკეული ნაწილების (თმები, სისხლძარღვები და მისთანანი) გამოსახვისა და ამას მხატვრული სახის გააზრებაში იგი უდიდეს მნიშვნელობას ანიჭებდა. მას სრულიად განსაკუთრებული ადგილი უკავია ძვ. წ. V ს. პირველი ნახევრის ბერძნული ხელოვნების ისტორიაში. მას არ შეუქმნია სკოლა და არც აშკარად აღიარებული მიმდევრები ყოლია თანამედროვეთა შორის, თუმცა მისგან ბევრი რამ გადაიღეს. საინტერესოა, რომ პითაგორე რეგინელის მხატვრულ პრინციპებს მხოლოდ ძვ. წ. IV საუკუნეში გამოუჩნდნენ ნამდვილი მიმდევრები, მათ შორის იყო ცნობილი მოქანდაკე ლისიპოსი.
