პრასანა
Allium paradoxum (Bieb) Don. — პრასანა
მრავალწლოვანი ბოლქვოვანი მცენარეა, 20-30 სმ სიმაღლის ღეროთი და მარტოული, პრიალა, ხაზური, 0,5-1-2,5 სმ სიგანის ფოთლით. ყვავილები თეთრია, გრძელყუნწიანები, მათ ძირში პატარა ზომის მომრგვალო ბოლქვებით, რომლებიც ჯგუფურადაა განვითარებული. ყვ. V; ნყ. VI.
ხასიათდება საკვები და სამკურნალო მნიშვნელობით.
ჰირკანული სახეობაა; კლასიკური ადგილსამყოფელია – საქართველო. ტიპი პეტერბურგში (Гроссгейм, 1940).
საერთო გავრცელება: ჩრდ.ირანი, შუა აზია (მთიანი თურქმენეთი, დას.კოპეტ-დაგი) (Фл. СССР, 1935).
კავკასია: დაღესტანი; აღმ. ამიერკავკასია, თალიში (Гроссгейм, 1940; Фл. СССР, 1935).
საქართველოში გავრცელებულია: ქართლი (საქ.ფლორა, 1941; საქ. მც.სარკვ., 1969).
თბილისის მიდამოებში იზრდება: თელეთის ქედზე, კოჯორში, ბეთანიაში, სარკინეთის, არმაზისა და მართაზის ხეობებში, საგურამოს ქედზე, ნორიოში, ბევრეთში, გლდანი-თიანეთის ტყეებში, თბილისის ბოტანიკურ ბაღში.
პრასანა პოლიკარპული ეფემეროიდული გეოფიტია, ტყის ტიპიური მცენარე. უმთავრესად იზრდება მუხნარ-წიფლნარებსა და რცხილნარებში; ზოგიერთ ადგილას ჰქმნის გაზაფხულის სინუზიას. კარგად ვითარდება დაჩრდილულსა და შედარებით ნოტიო ადგილებში; მრავალრიცხოვანი პოპულაციები აღირიცხება: ბოტანიკურ ბაღში, მართაზის, არმაზის ხეობებში, საგურამოს ქედზე, კოჯრის მიდამოებში.
მიუხედავად იმისა, რომ არ მიეკუთვნება იშვიათ მცენარეთა რიცხვს, პერსპექტივაში სასურველია მისი კულტივირება.
