პულჩინელა
პულჩინელა – (იტალ. pulcinella), იტალიურ კომედია დელ’არტე პერსონაჟი. ეს ნიღაბი წარმოიშვა სამხრეთ იტალიაში (ნეაპოლი), მე-16 ს. ბოლო ათწლეულში მასში შერწყმული იყო პირველი და მეორე ძანის სახასიათო ნიშნები: მიამიტობა, სოფლის მსუნაგის სიტუტუცე და სიზანტე, ქალაქელის მოხერხებულობა და საზრიანობა.
არლეკინოსთან ერთად, იგი ყველაზე პოპულარულია ნიღბებს შორის. მხიარულს და ენამოსწრებულს, მრავლად შეაქვს სატირული ელემენტი კომედია დელ’არტეში. პულჩინელა ტრადიციულად ასე გამოიყურება: მხრებში მოხრილი, დიდი მოკაუჭებული ცხვირი, ჯვალოსაგან შეკერილი ჩაცმულობა, ახურავს წვეტიანი ქუდი. პულჩინელას ხასიათი საბოლოოდ ჩამოყალიბდა მე-17 ს. გამოჩენილი იტალიელი კომედიანტის ს. ფიორილოს ზეგავლენით. მას რამდენიმე საინტერესო შტრიხი შესძინა ა. კალჩეზემ (ჩუჩო). იტალ. პულჩინელა ენათესავება პოლიშინელს (საფრანგეთი) და პანჩს (ინგლისი).
