საზღვაო სათანამგზავრო კავშირის საერთაშორისო ორგანიზაცია
საზღვაო სათანამგზავრო კავშირის საერთაშორისო ორგანიზაცია – საერთაშორისო სამთავრობათაშორისო ორგანიზაცია, შეიქმნა ლონდონში ხელმოწერილი კონვენციის (3.IX.1976) საფუძველზე, რომელიც ძალაში შევიდა 16.VII.I979. ფუნქციონირება დაიწყო 3.II.1982. ორგანიზაციის წევრია 160-ზე მეტი სახელმწიფო.
ორგანიზაციის მიზანია ე.წ. კოსმოსური სეგმენტის უზრუნველყოფა, რაც აუცილებელია საზღვაო კავშირის გაუმჯობესებისათვის ზღვაზე ადამიანის სიცოცხლის დაცვის სისტემის, ხომალდების საქმიანობის და მათი მართვის ეფექტურობის ამაღლების, საზღვაო საზოგადოებრივი კორესპონდენციების ინტერესებში. ორგანიზაციის ტექნიკური და ფინანსური საკითხები რეგლამენტირებულია კონვენციასთან ერთად ხელმოწერილი საექსპლუატაციო შეთანხმებებით.
საზღვაო სათანამგზავრო კავშირის საერთაშორისო ორგანიზაციის უმაღლესი ორგანოა ასამბლეა, რომელსაც იწვევენ 2 წელიწადში ერთხელ, ფუნქციონირებს ასევე საბჭო და დირექტორატი. საბჭოს შემადგენლობაში შედიან საექსპლუატაციო შეთანხმების 22 მონაწილის წარმომადგენლები, 18 სახელმწიფო, რომელთაც ორგანიზაციის ბიუჯეტში შეიტანეს ყველაზე დიდი ფინანსური შესატანი, და 4 სახელმწიფო, რომელთაც ირჩევს ასამბლეა სამართლიანი გეოგრაფიული წარმომადგენლობის საფუძველზე. საბჭოს გადაწყვეტილება მიიღება ე.წ. „აწონილი ხმის მიცემის პრინციპით (თითოეული მონაწილის ხმების რაოდენობა შეტანილი თანხის პროპორციულია). ორგანიზაციის ადგილსამყოფელია ლონდონი.
