სან-ფრანცისკოს კონფერენცია 1951

NPLG Wiki Dictionaries გვერდიდან
გადასვლა: ნავიგაცია, ძიება

სან-ფრანცისკოს კონფერენცია 1951 – გაიმართა 4-8 სექტემბერს. მოწვეულ იქნა აშშ-ისა და დიდი ბრიტანეთის ინიციატივით.

კონფერენციის მუშაობაში მონაწილეობა მიიღო 52 ქვეყნის დელეგაციამ. ინდოეთმა და ბირმამ უარი განაცხადეს თავისი წარმომადგენლების გაგზავნაზე. კონფერენციაზე საერთოდ არ იყო წარმოდგენილი ჩინეთი. არც კუნძულ ტაივანზე გახიზნული ჩან კაიშის მთავრობა (მისი მოწვევის წინააღმდეგ გამოვიდა დიდი ბრიტანეთი). სან-ფრანცისკოს კონფერენციას უნდა დაემტკიცებინა იაპონიასთან სამშვიდობო ხელშეკრულების პროექტი, რომლის საბოლოო ვარიანტი შემუშავებულ იქნა აშშ-ისა და დიდი ბრიტანეთის მიერ და გამოქვეყნდა 1951 წლის 13 აგვისტოს.

კონფერენციაზე ადგილი ჰქონდა მწვავე დაპირისპირებას დასავლეთის სახელმწიფოებსა და სსრკ-ს შორის, სან-ფრანცისკოს კონფერენციის გახსნისთანავე საბჭოთა მხარემ, პოლონეთისა და ჩეხოსლოვაკიის მხარდაჭერით, წამოაყენა წინადადება, კონფერენციის მსვლელობაში მონაწილეობის მისაღებად მოეწვიათ ჩინეთის სახალხო რესპუბლიკის წარმომადგენლები, მაგრამ ეს მოთხოვნა უარყვეს. 5.IX კი სსრკ-ის დელეგაციის ხელმძღვანელმა ა. გრომიკომ სცადა, შესწორებები შეეტანა სამშვიდობო ხელშეკრულების პროექტში. ა. გრომიკოს ამ გამოსვლის ერთადერთი მიზანი იყო ჩაეშალა კონფერენცია, მაგრამ მას არაფერი გამოუვიდა. ერთგული სატელიტების გარდა, საბჭოთა დელეგაციას მხარი არავინ დაუჭირა. 7 სექტემბერს კი იაპონიის დელეგაციამ მიიღო აშშ-ისა და დიდი ბრიტანეთის მიერ წარმოდგენილი პროექტი და 8 სექტემბერს შედგა სან-ფრანცისკოს საზავო ხელშეკრულების ხელმოწერის ოფიციალური ცერემონია. სან-ფრანცისკოს ხელშეკრულებაზე ხელის მოწერაზე უარი განაცხადეს მხოლოდ სსრკ-მა, პოლონეთმა და ჩეხოსლოვაკიამ.

წყარო

ქართული დიპლომატიური ლექსიკონი

მოძიებულია „https://www.nplg.gov.ge/wikidict/index.php?title=%E1%83%A1%E1%83%90%E1%83%9C-%E1%83%A4%E1%83%A0%E1%83%90%E1%83%9C%E1%83%AA%E1%83%98%E1%83%A1%E1%83%99%E1%83%9D%E1%83%A1_%E1%83%99%E1%83%9D%E1%83%9C%E1%83%A4%E1%83%94%E1%83%A0%E1%83%94%E1%83%9C%E1%83%AA%E1%83%98%E1%83%90_1951&oldid=235931“-დან
პირადი ხელსაწყოები
სახელთა სივრცე

ვარიანტები
მოქმედებები
ნავიგაცია
ხელსაწყოები