სილაური
სილაური — სოფელი საქართველოში, გურიაში, ოზურგეთის მუნიციპალიტეტში, თემის ცენტრი (სოფელი სილაური). მდებარეობს მდინარე სუფსის მარჯვნივ, ზღვის დონიდან 100 მ., ოზურგეთიდან 13 კმ. სოფელში ჩამოედინება მდინარეები რობა და მამათისღელე.
სახელწოდება
ადგილობრივ გავრცელებულ ხალხურ გადმოცემას თუ ვერწმუნებით, სოფელს ასეთი სახელი იმიტომ შერქმევია, რომ აქ ყოფილა ნამდინარევი, სილიანი, ძალზე ნოყიერი და უხვმოსავლიანი ადგილები ((ვ. მექვაბიშვილი, ს.სილაური). ეს შეიძლება მართლაც ასე იყოს, ოღონდ –ურ||-ულ- სუფიქსით გაფორმებული სოფლის სახელები გურიაში ძირითადად გვარსახელური წარმოშობისანი არიან: ნიაბაური, იანეული, გოგოური, ლიხაური, ბოხვაური, მშვიდობაური, ჟანაურა, ჟანიეთური, შველაური, ქადაგაური, ციცაბაური, ჩოხატაური, ჩაკიტაური.…).
ამის კვალობაზე შეიძლება სილაურიც ანთროპონიმული წარმოშობის სახელად მივიჩნიოთ, ოღონდ სილა- ფუძეს ფონეტიკური ცვლილება განუცდია. იგი, სავარაუდებელია, უკავშირდებოდეს გვარ სირაძეს. თავდაპირველად უნდა გვქონოდა სირა-ურ-ი, მაგრამ დისიმილაციის შედეგად საბოლოოდ სილაური მიგვიღია. სილაური, ამრიგად, კუთვნილების აღმნიშვნელ სახელად უნდა მივიჩნიოთ. იგი ნიშნავს: ადგილი, რომელიც ძველად სირაძეთა საკუთრება ყოფილა“. როგორც ჩანს, სილაური ძველად ერქვა ერთ-ერთ მიკროობიექტს (მინდორი, მთა, ჭალა), შემდეგ კი აქ გაშენებული სოფლის საკუთარ სახელად ქცეულა.
