სწრაფად ცირკულირებადი აშლილობები
სწრაფად ცირკულირებადი აშლილობები - ზოგიერთი ბიპოლარული აშლილობა რეგულარულად მეორდება ეპიზოდებს შორის რამდენიმე დღიანი ან კვირიანი ინტერვალით. მე-19 საუკუნეში განმეორებადი აშლილობები ფრანგმა ფსიქიატრმა ფალრემ (1854) აღწერა, როგორც ცირკულარული შეშლილობა. დღევანდელ დღეს ბიპოლარული აშლილობის მქონე პაციენტებში გუნებ-განწყობის ხშირ რეკურენტობას, ჩვეულებრივ, სწრაფად ცირკულირებად აშლილობებს უწოდებენ. რეკურენტული ეპიზოდები შესაძლოა იყოს დეპრესიული, მანიაკალური ან შერეული. სწრაფად ცირკულირებადი აშლილობების თავისებურებებია: ხშირი რეკურენტობა (მინიმუმ, ოთხი მკაფიოდ გამოხატული ეპიზოდი წლის მანძილზე), ეპიზოდებს შორის ხანმოკლე რემისია ან ერთი ეპიზოდიდან საპირისპიროზე გადასვლა. სწრაფად ცირკულირებადი აშლილობების მართვისა და პრევენციისთვის განსაკუთრებით მნიშვნელოვანია შემდეგი კლინიკური მახასიათებლები:
- უფრო ხშირია ქალებში;
- ხშირად თან ახლავს ჰიპოთირეოზი;
- შესაძლოა გამოწვეული იყოს ანტიდეპრესანტების მიღებით;
- მის სამკურნალოდ ლითიუმი ნაკლებად ეფექტურია.
სწრაფად ცირკულირებადი აშლილობების კლინიკური მახასიათებლებისა და მკურნალობის შესახებ დამატებითი ინფორმაციის მისაღებად იხ. მაკინი და იანგი (Mackin and Young, 2004).
