უინძორის შეთანხმება 1899
უინძორის შეთანხმება 1899 – ინგლის-პორტუგალიის საიდუმლო დეკლარაცია, რომელსაც ხელი მოაწერეს 14-X უინძორში (ინგლისი) ლორდმა რ. სოლსბერიმ და პორტუგალიის ელჩმა ლონდონში სოვერალმა.
უინძორის შეთანხმება იძლეოდა პორტუგალიისა და მისი კოლონიების ტერიტორიების ხელშეუხებლობის გარანტიას და შეიცავდა ინგლის-პორტუგალიის 1642 წლის 19.I. ხელშეკრულების პრეამბულიდან ნაწყვეტს, რომელიც აცხადებდა ორ ქვეყანას შორის მეგობრული ურთიერთობის დამყარებას; 1661 წლის 23.VI შეთანხმების საიდუმლო ტექსტს, რომლითაც ინგლისი ვალდებულებას კისრულობდა, დაეცვა პორტუგალიის სამფლობელოები ყველა სხვა სახელმწიფოს თავდასხმისაგან. პორტუგალიას თავისი აფრიკული სამფლობელოების ტერიტორიიდან არ უნდა გაეშვა ბურების რესპუბლიკისათვის ჯარი, სამხედრო იარაღი და მასალა. უინძორის შეთანხმება ნიშნავდა ინგლისსა და გერმანიას შორის პორტუგალიის კოლონიების გაყოფის გეგმაზე უარის თქმას.
