შალის თეორემები

შალის თეორემები

1. მყარი, ბრტყელი ფიგურის მოძრაობა საკუთარ სიბრტყეში შეიძლება წარმოვადგინოთ, როგორც გადატანითი და ნებისმიერი წერტილის (პოლუსის) გარშემო ბრუნვითი მოძრაობის ერთობლიობა.

2. ბრტყელი ფიგურის ნებისმიერი არაგადატანითი გადაადგილება თავის სიბრტყეში შეიძლება განხორციელდეს, როგორც გარკვეული წერტილის გარშემო ბრუნვა.

3. მყარი სხეულის ბრტყელი პარალელური მოძრაობა რაიმე Π სიბრტყის მიმართ შეიძლება განვიხილოთ, როგორც პოლუსთან ერთად გადატანითი მოძრაობისა და პოლუსზე გამავალი Π სიბრტყის მართობული ღერძის გარშემო ბრუნვითი მოძრაობის ერთობლიობა.

4. მყარი სხეულის ნებისმიერი გადაადგილება სივრცეში შეიძლება წარმოვადგინოთ, როგორც გადატანითი და რაიმე ღერძის გარშემო ბრუნვითი მოძრაობების ერთობლიობა; ამასთანავე, გადატანითად მოძრაობისას სხეულში ნებისმიერად არჩეული პოლუსი თავისი პირვანდელი მდებარეობიდან გადადის საბოლოო მდებარეობაში, ხოლო ბრუნვა ხორციელდება პოლუსზე გამავალი რაიმე ღერძის გარშემო. გადატანითი მოძრაობის მიმართულება და მანძილი იცვლება პოლუსის არჩევაზე დამოკიდებულებით, ხოლო ბრუნვის ღერძის მიმართულება და მის გარშემო მობრუნების კუთხე არ არის დამოკიდებული პოლუსის არჩევაზე.

წყარო

მათემატიკის ენციკლოპედიური ლექსიკონი