წყლისმიერი დაბრკოლების დაზვერვა
წყლისმიერი დაბრკოლების დაზვერვა – წყლისმიერი დაბრკოლების და მიმდებარე ადგილმდებარეობის ხასიათის ამსახველი მონაცემების მოპოვება, შეგროვება და განზოგადება.
წყლისმიერი დაბრკოლების დაზვერვის მიზანია, შეარჩიოს ადგილები წყლისმიერ დაბრკოლებასთან ფარული გასვლისთვის, გადასასვლელების მოწყობისა და დაბრკოლების ფორსირებისათვის. ეკისრება საჯარისო ან საინჟინრო დაზვერვას. წყლისმიერი დაბრკოლების დაზვერვა ადგენს წყლისმიერ დაბრკოლებასთან გასასვლელი გზების არსებობას, ადგილმდებარეობის გამავლობას და შემნიღბავ თვისებებს მისადგომებზე, ღობურებისა და დასნებოვნების ზონების არსებობას; ნაპირების ხასიათს, დინების სიგანეს, სიღრმეს, სიჩქარეს, წყლის ზედაპირის ღელვის ინტენსივობას, გრუნტების მზიდ უნარს, ფსკერის და ნაპირების პროფილს, ფონის, ყინულის (ყინულსვლის) და თოვლის, წყალში არსებული დაბრკოლებების არსებობას და მახასიათებლებს; ყველაზე მოსახერხებელ ადგილებს გადასასვლელების მოსაწყობად და დასაცავად, არსებული ხიდების და გადასასვლელების, ჰიდროტექნიკური ნაგებობების, ადგილობრივი მცურავი საშუალებების და მასალების არსებობასა და მდგომარეობას.
წყლისმიერი დაბრკოლების დაზვერვისათვის გამოიყენება საინჟინრო-სადაზვერვო მანქანები, მცურავი ტრანსპორტიორები, კატარღები, ნავები, წყალქვეშა ბუქსირები, სათვალთვალო და მანძილის გასაზომი ხელსაწყოები, ექოლოტები, კუთხსაზომები, ფოტო აპარატურა, ნაღმასაფეთქებელი, დაბრკოლებებისა და დასნებოვნების სიდიდის აღმოჩენის საშუალებები. წყლისმიერი დაბრკოლების დაზვერვას ორგანიზაციას უწევენ შენაერთების, ნაწილების (ქვედანაყოფების) მეთაურები და შტატები, აგრეთვე ჯარების გვარეობების (ძალების), სპეციალური ჯარებისა და სამსახურების უფროსები.
