ადგილმდებარეობის დამცავი თვისებები
ადგილმდებარეობის დამცავი თვისებები - რელიეფის, მცენარეულობისა და ადგილობრივი საგნების თავისებურებები, რომლებიც შესაძლებელს ხდიან შესუსტდეს დაზიანების საშუალებათა ზემოქმედება. საუკეთესო დამცავი თვისებებით გამოირჩევა ხევებით, ღრანტეებითა (ღრმა და ვიწრო ხრამი) და ხრამებით დასერილი მთაგორიანი ადგილები.
ხრამმა შეიძლება 1,5-ჯერ შეასუსტოს დარტყმითი ტალღის მოქმედება. ტყის მასივები დარტყმით ტალღას ასუსტებენ 2-ჯერ, შუქგამოსხივების ზემოქმედებას ამცირებენ 6–8-ჯერ. მაღლობების პირიქითა ფერდობებზე ბირთვული დარტყმითი ტალღის წნევა 2–2,5-ჯერ ნაკლებია, ვიდრე დაბლობზე.
ადგილმდებარეობის ნაოჭები ირეკლავენ შუქგამოსხივებას და გამჭოლ რადიაციას. სხვადასხვა იარაღის დამაზიანებელი ზემოქმედებისაგან საიმედოდ იცავენ მიწისქვეშა გამოქვაბულები, მღვიმეები და გრუნტის სისქეში არსებული სხვა ბუნებრივი წარმონაქმნები.
